Villasuso jauregia

Villasuso jauregia hirigune historikoan dago, Aihotz plaza ezagunean eta San Migel elizaren ondoan. 1539. urte aldera eraiki zuten, Martin de Salinasen, Karlos I. enperadorearen gorteko enbaxadorearen aginduz.

Jauregi dotorea egitea lortu zuten, harlanduxka eta harlandua erabiliz. Hasieran, ate nagusia Villasuso plazatxoan zegoen, eta han jarri zuten Salinastarren armarria zutabez apaindutako ate baten gainean. Gaur egun, ordea, beste aldetik, Aihotz plazatik, sartzen da barrura. XX. mendean Udalak hartu zuen jauregiaren jabetza eta biltzarrak, hitzaldiak eta erakusketak egiteko atondu zuen.