Kurutziaga gurutzea

Kurutziagako Gurutzearen gordeleku eta babeslekua Kurutzesantu Museoa – Turismo Bulegoa da 2010etik.

Europa osoan bakarra den gurutze gotiko eder horrek Monumento historiko-artistiko kategoria du.

XV. mende bukaera eta XVI.mende hasiera artean altxatu zen. Azpialdetik hasten den istorio bat kontatzen du: fustetik hasten da bekatua eta zigorra irudikatzen, kapiteletik igotzen da, Eliza eta Ebanjelioa errepresentatuz, eta gurutzaduran Erredentzioa azaltzen da, hau da, Barkamen eta Salbazioaren mezua, itxaropena.

Funtzio mugakide argia zeukan Durango uriko amaiera markatzeko, baina gainera, gurutzearen esanahiari buruzko bertsio ezberdinak daude. Horietako bat "Durangoko heretikoak" gertakariarekin lotzen du, eta barkamen-monumentua dela uste dute. Beste egile batzuek, aldiz, Kurutzesantu kofradiarekin eta ermitarekin duen harremana defendatzen dute eta uste dute kofradiak enkargatu zuela.