Areatzako Alde Zaharra

Areatzako alde zaharra txikia baina polita da, herri giroa eta baserri giroa uztartuta agertzen dira bertako eraikinetan.

Arratia ibaiaren albotik doazen kaleetan eraikin erlijiosoak zein etxe tipikoak daude. Udaletxearen plazan herriko eraikinik aristokratikoena dago: Gortazar jauregia. Bi zati desberdin ditu, behekoa harlanduz egina dago eta XVI. mendekoa da. Goikoa berriz, adreiluz eginda dago eta XVII. mendekoa da. Deigarrienak aurrealdean dituen pinturak dira.

Udaletxea berriz XIX. mendekoa da, estilo neoklasikokoa. Erdi puntuko hamaika arkuz egindako arkupea du behean. Ikustekoa da baita San Bartolome eliza, ataria interesgarria da.