Gaztelugatxeko Donieneko Biotopo Babestua

Gaztelugatxeko Biotopo Babestua (158 ha) Bakioko inguruetatik (mendebaldean) Matxitxako lurmuturreraino (ekialdean) zabaltzen da, Bizkaiko itsasertzean. Inguru bikain horretan, labarrek ikuspegi eder paregabea erakusten dute, batez ere, itsasoaren kolpeen ondorioz.

Sailkapena:

Biotopo babestuak

Udalerriak:

Bizkaia: Bakio, Bermeo.

Informazioa:

Bakioko Turismo Bulegoa
Telefonoa: 946 193 395
Faxa: 946 193 161
Emaila: turismo@bakio.org

Bermeoko Turismo Bulegoa
Telefonoa: 946 179 154
Faxa: 946 179 152
Emaila: turismo@bermeo.org

Servicios:

Informa de la existencia de una ruta-circuito para hacer gimnasia o deporte

Datos de interés:

Hala, Bermeo eta Bakio lotzen dituen errepidetik kareharrizko irlatxo bi ikus daitezke, itsaslabar malkartsuaren aurrean: Gaztelugatxeko Doniene eta Aketxe. Lehena itsasoaren olatuek zizelkatutako haitzen gainean eraikitako zubi baten bitartez heltzen da lurrera. Alde batean, itsasoak harkaitzetan zulatutako tunelak, naturaren gutiziak, ikus ditzakegu. Tontorrean berriz, ermita bat dago, eta, bertara iristeko, zubia igaro eta 273 eskailera-maila igo behar dira. Herri kondairak dioenez, San Joan Bataiatzailea bera Gaztelugatxe ikustera joan zen. Bermeoko portura itsasontziz heldu zen, eta, handik hiru pauso emanez, uhartera iritsi zen. Azken pausoa zubia eraikita dagoen tokian eman omen zuen. Historian zehar, ermitak hainbat aldiz su hartu du eta kortsarioek harrapaketak egin dituzte bertan. Hori dela eta, eraikina berreraiki behar izan dute.

Aketxera, berriz, itsasotik baino ezin da heldu eta, horregatik, giza presentzia txikia izan da bertan. Isolamendu horrek eta uhartearen ezaugarriek itsas hegazti ugariren gustuko toki bihurtu dute. Besteak beste, ekaitz-txori arruntak, ubarroi mottodunak, oin horidun kaioak eta haitz-usoak daude Aketxen.

Oharrak

Lurretik kanaberaz arrantzan egitea baimenduta dago.

Biotopoan zehar, ibilbide polita egin daiteke, naturguneko tokirik esanguratsuenetan barrena.

Fauna

Itsas hegazti askok atseden hartzen dute Aketxen; ubarroi mottodunek, oin horidun kaioek eta ekaitz-txoriek, esate baterako. Azken hori ez da oso ezaguna hemen. Europako hegaztirik txikiena da, txolarrea bera baino txikiagoa, hain zuzen. Itsaso zabalean bizi da eta umatze-garaian bakarrik hurbiltzen da kostaldera, betiere, gaueko iluntasunaren babesean.

Horrez gainera, itsaslabar hauetan haitz-usoa (hezitako usoen arbasoa) ere ikus daiteke. Hegazti-mota horren populazioa benetan eskasa da.

Bizkaiko kostaldearen zati honetako uretan lupiak, paneka handiak eta txitxarroak bizi dira, baita itsas aingira, itsasugeak eta beste harrapari batzuk ere. Itsasertzean, sakonera gutxiko lekuetan, alga gorri eta karedunen artean, itsas bareak, karraspioak, dontzeilak, olagarroak, nekorak, itsas trikuak eta txangurroak aurki ditzakegu. Haitzetan, berriz, sukaldaritzan hain preziatuak diren lanpernak daude.

Flora

Landareei dagokienez, nabarmentzekoa da basolibondoa, landutako olibondoaren basoko arbasoa, jada XIX. mendeko botanikari batzuek ikusi zutena. Beste espezie batzuk ere ageri dira, Cochlearia danica eta Limonium binervosum, esate baterako. Mendialdean, inguruko baserrietatik gertu, txilarrak, ote zuriak, arteak eta mahastiak daude.

Kokapena eta ostatuak inguruan

Sarbidea: BI-3101 Bermeo eta Bakio lotzen dituen errepidea hartu behar dugu Gaztelugatxera iristeko.

Garraio publikoa: Udan, Bermeo eta Bakio batzen dituen autobusak (Bizkaibus) geltokia dauka bertan.

Aparkalekua: Ermitara igotzeko eskaileraren oinetan aparkaleku gutxi batzuk daude. Bestela, handik kilometro batera dagoen behatokian utz daiteke autoa.